TUTTU A POSTU

TUTTU A POSTU

Spissu mi succedi
ca quannu ‘ncuntru ‘n’ amicu
m’addumanna: “Comu va”?
Iu cci rispunnu: “Tuttu a postu”.

Cu sta rispostra ca cci dugnu
Ddà pi ddà
pari ca m’alliggirissiru li pinzeri.

Appena l’amicu s’alluntana
subbitu m’addugnu
ca senza lu so’ vuliri
mi detti ciusciuna ‘nta lu cori
unni svampanu braceri di focu
ca ‘un pozzu astutari.

Poi ‘ntra mia e mia mi ‘ncuraggiu
pinzannu ca strata facennu
qualchi malu pinzeri lu vaju lassannu
ma ‘un mi votu nnarreri
pi lu scantu
ca chiddu ca rinesciu
a siminari pi la strata
mi po’ turnari ‘n menti.

Chiddu ca ‘un rinesciu a siminari pi la strata
mi strinci lu pettu cu grossi catinazzi
mentri li chiavi di la spiranza
si persiru ‘nfunnu lu mari.

Notti e ghiornu mi rivotu
circannu di spirugghiari
marreddi di pinzeri ‘mpirugghiati
mentri lu mè cori
strittu e ‘nguttumatu
resta mutu.